[灌毛毛雨]清明缅怀网路历程(沪语版）

老开 - 2008-4-4 2:53:00

闲聊混过的论坛及网名

做人比较懒扑，虽然十年前头就开始上网，真正混论坛还是要到00年30岁格高龄。混过个论坛也勿多，还是懒扑格关系，两只手就数得过来。其中有好几只赛过像蜻蜓点水一样，发了一两只帖子，回了五六句闲话，就连潜水格工作也放弃了。真正混得人头比较熟格，也就五只。

第一只是只学英文格网站，www.icansay.com。与其讲是去学英文，还勿如讲是去卖弄卖弄。伊格辰光天天勒屋里帮囡儿抄澌布，比较空虚，精神高头极度需要满足。格只网站里妹妹多，像我格种英文中文才勿摊板，成熟幽默性格开朗格已婚男人想勿受欢迎也老难格。伊个辰光用格网名叫openman，起格只名字是因为当时看了Al Pacino格一部电影，里厢伊讲自家是个open man，没啥事体好瞒人家格。我觉着帮我格性格蛮像格，就拿来用了。

第二只论坛是第一只论坛里认得格妹妹带我去格，是只帮弄堂差不多格私人网站，叫迷你海伦。听讲电脑报啷厢介绍过，伊个辰光阿算有点小名气，去格大部分是上海人，大家谈谈聊聊蛮开心。可惜勿晓得啥个原因，勒末生头网站上勿去了。过了腔再去看看，主页勒嗨论坛还是没了。刚刚试了一记，主页阿没了。当时相信上网灌水就是排泄，从来没想过排泄物还好藏了嗨到别他地方循环再利用，所以写格一点物事才没留档。有两篇落忒真格老可惜，尤其是一篇写划拳格，从宝不出一路介绍到满堂红，勿要讲80后，70后晓得格阿勿多。现在是提勿起心向重写一遍了。

勒格的我格网名叫偶奔慢。虽然是openman格谐音，别过蛮有眼意思。偶奔慢其实勿是我自家起格，是勒第一只论坛里认得格算得上神交格一个兄弟叫开格。还是伊，介绍我去了第三只论坛，故乡网格读书吧。

故乡网勿像伊只学英文网站加青春，阿勿像迷你海伦伊能架小资，里厢混格才是点欢喜爬格子格朋友。记者，编辑，文人，老师，还有交关渴望自家作品有机会印了纸头高头格文学青年。阿拉呢，啥个阿勿是，所以就帮自家起了一只网名叫附庸。人家看到格只网名要么觉着阿拉老谦虚格，要么觉着阿拉勒摆标镜。其实我是一个老实事求是格男人，就算要豁胖阿勿会得去豁了一帮秀才格头高头去格。小辰光阿拉老外婆曾经教导过我，‘千万勿要像那娘一样读书读到屁眼里去’。可惜伊格辰光阿拉没听进去，滥七八糟格书读了勿少。长大以后越来越觉着一个旧社会文盲娘姨对读书无用论格深刻看法，拷廿岁踏上社会后就没好好叫寻书看。侬讲我跑到故乡网格读书吧去勿是附庸是啥。

进去混混，气氛还可以。到底是秀才窠，瞎七搭八像丁页啊，弓虽啊基本啷没。吵起相骂来要么阴势骨搭龊里龊刻，要么慷慨激昂落地有声。反正一有相骂炒，论坛就好闹热一腔，格帮其它论坛差勿多。我去格辰光好像开始走下坡路，发帖格少，看帖格多，一帮潜水格屁眼老得一塌糊涂。我勒伊面发帖，有几个朋友看出来我比较浆糊，有空就一道捣捣白相相。格段辰光正好挨着帮儿子抄澌布，灌过几只水塘，格趟魂灵生进，全部藏了硬盘里，等待机会南水北调，西水东进。

读书吧有个资深网友叫‘搬起脚砸石头’，是只模子。老小格辰光就开始跑码头，从新疆到上海，两只脚肯定欺负过勿少石头。散文写得不错，雅俗共上，从进口写到出口。出彩的要数游记，图文并茂，再加上眼典故啊诗词格浇头，有味道。真真让伊混到啥地方才人见人爱格是伊搬格功夫。当然勿是搬脚，是搬帖子。经常会去搬点经典帖子来，老少有看过没印象格。

年头回上海格辰光特为碰碰头，照照面。伊讲起过两天有只伊经常混格论坛格聚会，如果有兴趣一道去玩玩。伊大概是客气，没料到我格个人只要听到聚会，勿关认得勿认得，一律豁上。伊讲个论坛就是作家陈村看门格小众菜园。

菜园只门还勿大好进，先要寻格介绍人，再要问村长领派司。亏得有搬格能家立身格介绍人，再加上帮陈村座了一张台面边啷吃了顿饭，我就格能家混了进去。里厢头沙龙格气味交关重，相当一部分菜农是勒上海文艺界里混格，大家抬头勿见低头见。我反正帮伊拉勿搭界，有帖子就丢两只上去（现在晓得排泄物循环利用格好处了），有看法就跟两帖，看到好帖就顶两记，阿蛮乐惠。

我格本名叫张青，帮水浒里卖人肉包子格菜园子张青同名同姓。小辰光就有人叫过我菜园子，我老勿焐心格，老希望自家好再多出三点水来，做没羽箭张清，做天罡星。长大了阿没做包子生意，想来想去主要还是没寻着孙二娘，原材料比较难搞。格趟去菜园白相，拿菜园子做网名还算当对。

我最近开始混格论坛就是弄堂了。弄堂格堂主之一叫老皮皮，伊阿勒菜园里厢混。伊个人味道哪能勿清爽，没咬过。伊拍格照片相当挺括，曾经有一组蜘蛛吃苍蝇全过程近距离抓拍，让人对伊格臂力和蹲功肃然起敬。后来又晓得伊办了只网站叫弄堂。敦了上海格可能不晓得，弄堂两个字对离乡背井有眼岁数格上海人格杀伤力是老结棍格。屏勿牢去逗了两圈看看，弄了中高级两套上海闲话测试题做做，还算得上是格上海人。觉着只论坛有眼混头，就留了下来。

我叫自家openman格辰光就有人好白相叫我做‘开人’，我曾经去上海人刀扛母混过两天，伊面头小赤佬瞎多，就用了只网名叫老K。格趟混弄堂总归要弄只比较海派眼格网名，又感叹一记自家勿做小开已经好几年，决定就用老开做网名。结果感叹一记头收勿大牢，就弄了篇“老开自传”。

老开 - 2008-4-4 8:51:00

册那，下半日贴格辰光格式有点乱，弄了半天结果漏忒一段。做事体塌头落佩。还好回转头看看。

说明一记，格是老里八早弄堂曾经有博格辰光瞎弄弄格。两年多前格事体了。现在吊出来看看还是蛮浆糊。[em02]

老皮皮 - 2008-4-4 11:27:00

走召弓虽口我丁页

大椿 - 2008-4-4 17:31:00

女尾女尾云力口斤 [em06] [em05]

老开 - 2008-4-6 22:56:00

雨纷纷，欲断魂。清明真是个缅怀的好日子。感谢各位与我一起同缅。

虽然说现在的时尚是不过三十就开始写回忆录，我却是真切地感受到，灌水的劲道是越来越弱了。真真是有点步入写帖不如回帖，回帖不如看帖的轨道了。

再来段四年前的旧水，与潜水员们共勉。

---

潜水的朋友浮上来

潜水的朋友浮上来
浮上来，浮上来
这里的灌水真不赖
请不要假装不理不睬

潜水的朋友浮上来
浮上来，浮上来
不要被我的主帖吓坏
其实我很可爱

寂寞水喉的悲哀
说出来，谁明白
求求你抛个丁页过来
哄哄我
逗我乐开怀

(嘿嘿嘿，没人理我，嘿！)

我左灌右灌，上灌下灌
原来潜水员们都不简单
我想了又想，我猜了又猜
潜水人的心事还真奇怪

寂寞水喉的大甩卖
左卖卖，右卖卖
为什么还是没人来踩
无人砸砖哪，真无奈

潜水的朋友浮上来
浮上来，浮上来
寂寞水喉喷出血来
需要你给我喝个彩
(嗨----嗨----！)

我左灌右灌，上灌下灌
原来潜水员们都不简单
我想了又想，我猜了又猜
潜水人的心事还真奇怪
我左灌右灌，上灌下灌
原来潜水员们都不简单
我想了又想，我猜了又猜
潜水人的心事还真奇怪

潜又何奈！
唻唻唻......喔哎噢！
唻唻唻......噢----！

(唉！算了，下线吧！)

哈哈 - 2008-4-7 11:34:00

纯沪语读起来勿是很舒服

华雨文 - 2008-4-9 20:57:00

终于了解老开格网络历程了。

ZUO123 - 2008-4-30 13:43:00

精彩！好看！[em05] [em06]

xjs55 - 2008-9-2 23:17:00

蛮有米道额

弄堂方丈 - 2008-9-3 21:11:00

欢迎回来扫墓

萝卜丝 - 2008-12-12 9:54:00

[em01]
老开，和你相比，我的网路历程太嫩了，二年前我才开始上网发帖，之前是不领市面不晓得有论坛这回事。
不过呢，阿拉始终认为，网就是网，千万不要在网中暴露真名大姓，也不要暴露照片。真诚虽然是高贵的品质，但却有极大可能会为自己带来不必要的麻烦，往往在你想不到的时候。

弄堂论坛