小举头 - 2006-8-18 9:17:00
尹大为
小字辈个滑稽戏长远勿听了，讲来讲去对方秃顶高头“几根发”，“车”（意：调侃）人家个生理缺陷，自家赞好个，越听越没劲。
有生理缺陷个人，总归怕人家讲到，迪个是人之常情。吾以前采访过一个老阿姨，退休以后老想学钢琴。但伊有一只手指头年轻个辰光工伤断脱了，老忌讳人家问到，就用纱布包勒迪只断脱个手指头上，包成一只手指个样子，硬劲去弹钢琴。人家问起伊个手，伊就讲切菜切着了。
阿拉《三人麻辣烫》有趟来了个女小人，小有名气个主持人，问起伊来了国外读中学个事体，伊讲来讲去“老开心个”，死活勿肯讲碰到个困难、挫折。还有一趟讨论“大娘子小丈夫”，来了个有名个男演员，林栋甫问伊：“侬太太年纪好像比侬大？”想不到伊一口否认：“大家赞晓得，阿拉老婆比吾小……”
有一集讲到小辰光，林栋甫讲：“人家上体育课个辰光，吾扒勒窗口头看，又不好去，吾脚坏脱个。还有弄堂里掼摔跤饶人家一只脚，不过吾斗鸡好，因为我人高，吾力量基本上赞是右脚撑勒嗨，吾斗鸡总归赢个。”电影导演张建亚老认真个对伊讲：“侬节目越做越灵了，来了《三人麻辣烫》里厢，会得盯牢自家个翘脚讲，赞个，赞个！”其实，阿拉林老师老注意自家形象个，平常衬衫赞要烫得笔挺再出门。
近腔把，主持人娄一晨、倪琳到《三人麻辣烫》来谈参加《舞林大会》好白相个事体。倪琳讲：“娄一晨跳好之后，我投票支持伊，我讲：‘做主持人，不怕有缺点，就怕没有特点，娄一晨是一个特点鲜明个主持人。’结果伊拉笑得来……曹大主持开始学伊：‘我支持娄一晨’，学伊迪那，眼睛一煞嘴巴一歪。结果娄一晨脾气老好个，伊不生气个，哈哈……”
娄一晨边笑边讲：“侬想，吾蹲勒台高头，生气有用场口伐？”倪琳补充：“后来伊帮我投票个辰光，伊哈迪那眼睛一煞嘴巴一歪：‘我来一只正版个！’哈哈……”
娄一晨：“做人做到吾迪那，哈是最高境界。做人要有自嘲精神。别人‘车’我算啥？吾自家‘车’自家，吾做摆那看，迪个是最最潇洒个！”
上海爵士 - 2006-8-18 12:01:00
ss12ld - 2008-8-11 16:23:00
是"叉"!!