[转帖]脑筋不转弯的绰号
文／尹大为
迭腔，世界杯闹猛啊，我发现外国人也欢喜帮别人起绰号。捷克队的核心罗西基，球迷叫伊“饺子”，因为伊欢喜吃“饺子”。阿根廷队小将特维斯，绰号“公牛”，因为伊狠。葡萄牙的菲戈，叫“未来战士”。讲到“绰号”，阿拉国家也是起绰号的大户，侬看《水浒》里的绰号，什么“智多星”、“花和尚”、“霹雳火”……千载之下，还是挺括煞克，弹眼落睛！
小辰光，被其他小朋友起了绰号，“挖湿”得不得了。20年以后，突然想起来，呒么绰号，童年会得多少无趣啊！
回想起来，阿拉小辰光起绰号大致有迭那几种起法：
1.谐音法。把和小朋友的姓名谐音相似的某个物品作为绰号。如果小朋友姓“王”，绰号一般就是“王八蛋”、“王昆山”、“黄金瓜”。如果姓“唐”，就叫“糖衣炮弹”。如果姓“严”，就是“盐金枣”。如果姓“朱”，格么就叫“猪八戒”……几年前在网上认识了一个美女“毛豆子”，“毛豆子”是伊网名，几年后伊带了外国老公回来办婚事，才晓得伊姓“茅”，“毛豆子”大概就是伊小辰光的绰号。当天还来了毛豆的赤裤姊妹“芋艿头”，两个美女蹲勒一淘，侬叫我一声“毛豆子”，我叫侬一声“芋艿头”，亲热得不得了。
有一趟和陈丹青“轧山湖”，伊讲几年前到南京去签名售书，书城门口竖着挂下两条老长的大横幅，一条是“著名画家陈丹青”，另一条与之并排“著名作家皮皮”，伊讲：“我勒么生头横过来一看，高头是‘陈———皮’，下头是‘丹———皮’……”伊两只水泡眼一淘眯起来，开心得像小孩一样。从此，阿拉私下头就叫伊———“老丹皮”。
2.形似法。把小朋友的外形特征或性格特征跟某样物品联系起来作为绰号。小朋友如果后脑勺比较扁，大家就会叫伊“小扁头”。比较高大的，就叫“长脚鹭鸶”。带眼镜的，叫伊“小四眼”。比较欢喜哭的小姑娘，就叫伊“蚌壳（谐音：碰哭）精”。老是晚上“画地图”的，就叫伊“赤水包”。
3.颠倒法。我有个好朋友对我讲，小辰光伊姆妈顶欢喜帮人家起绰号。伊拉一淘出去白相，一个身材矮小的人走过来，姆妈轻轻捏捏伊个小手：“长脚来了，长脚来了。”伊寻了半天，没发现“长脚”啊，原来是“反话”。有时姆妈讲：“大块头来了。”其实就一个瘦子走过，又是“颠倒法”。脑筋不转弯不来塞。伊姆妈老早有个同事，眼睛小，笑起来更加变成一条线，姆妈就叫伊：“九点一刻”。阿拉开头还听不懂，为啥呢？伊讲：“侬去看，钟走到九点一刻的辰光是啥个样子？”形象个！（此属第2法。）
长远不见的老同学碰着，讲到某某某，名字哪能也想不起来，一讲“小黑皮”，大家都笑了，亲切啊！这就是绰号的妙处。
